Direktur Keselamatan dan Pelayanan DAMRI...

Bar e inyong diangkat dadi Direktur Keselamatan dan Pelayanan neng perusahaan bis pelat abang DAMRI, tugas sing abot wis ngadang neng ngarep mata. Sempet kaget juga, bisa-bisane inyong diangkat dadi Direktur neng perusahaan kiye. Alasane jere simpel bae. Inyong kuwe pengguna setia bis DAMRI jurusan Jakarta – Purwokerto ben dina Jumat selama siji setengah taun. Aneh ya? Tapi priben maning. Surat keputusan wis diteken, pelantikane juga wis rampung dilaksanakna.

Sejujure inyong mandan ra pede dadi direktur neng DAMRI. Inyong ra nana pengalaman babar blas neng bidang transportasi darat. Pengalamane inyong ya mung dadi penumpang bis DAMRI ben dina Jumat sore. Tek etung-etung ya wis lumayan suwe, siji setengah taun. Tapi apapun pengalamane, tugas kiye kudu dilaksanakna demi perusahaan. Setuju ya?

Nah, sebagai direktur anyar aku mesti mikirna program-program sing apik nggo kemajuane perusahaan. Istilah keren e jaman siki: visi lan misi. Sing tek pikirna dhisit tentune sing ana kaitane karo pengalamane inyong sebagai pengguna bis DAMRI antar kota. Program e inyong yakuwe:

1.     Peremajaan bis

Menurut pengamatane inyong, bis DAMRI antar kota sing maring Purwokerto, Purbalingga, Bobotsari, Wonosobo, Cilacap, Purworejo, Jogja wis padha tua umure. Keton sekang bodine sing model lawas. Inyong tau ngobrol karo awak bis e, nek bis antar kota sing tek tumpake kuwe bekas e bis bandara. Wah.. bis bekas ya. Pantesan, bis sing tek tumpaki tau mogok. Selawase setahun setengah ngebis DAMRI, ana ping telu ngalami mogok. Ora mung inyong sing ngalami, kancaku pernah ngalami mogok juga. Akibat umure wis tuwa, nek lagi mlaku bodine dadi brisik kaya akeh sing kendor mur baute. Interior e juga katon mblekethek, elek. Tempat duduk empuke wis padha kurang, gawe bokong pegel lan panas. Malah ana sing wis lapisane pada suwek. Setelan (recleaning seat) juga ana sing macet. Trus AC-ne juga kadang-kadang bocor, banyune netes sekang nduwur kaya udan. Masa penumpange kudu nggawa payung? Nah, nggo peremajaan bis kiye usulane inyong sih secara bertahap. Tapi nek pemerintah gelem aweh modal penyertaan maning ya monggo.. bisa langsung diganti kabeh. Setuju?

2.     Modernisasi tiketing nganggo IT

Pingine inyong, tuku tiket bis kuwe bisa onlen kaya tuku tiket sepur. Tinggal klak klik neng ngarep komputer utawa nyak nyuk nganggo hp. Bisa juga pas lagi blanja keperluan sehari-hari sekalian tuku tiket bis neng minimarket sing melu kerja sama karo DAMRI. Inyong jane mandan isin, PO sebelah wis ana sing dodolan tiket liwat onlen, lho! Masa BUMN kalah dhisit karo swasta?

Keuntungan tiketing via onlen, kabeh penumpang bis dadi terdata. Pendapatan tiket juga secara real time langsung bisa dimonitor. Terus nek ana apa-apa juga gampang golet datane. Suatu saat mengkone data penumpang sing kesimpen bisa dianalisis lan dipelajari karakteristik lan perilakune. Apa maning nek ora nggo ningkatna pelayanan karo pendapatan perusahaan mbok...

3.     Ningkatna layanan penumpang

Konsumen kuwe macem-macem perilaku karo kepenginane. Kepenginan lan kebutuhane menungsa memang sifate ora terbatas, sementara sumber daya sing ana terbatas jumlahe. Sebagai direktur pelayanan, inyong duwe angen-angen nek konsumen bis DAMRI ngrasa puas nglewihi dhuwit sing dibayarna. Konsumen ora mung sekadar dadi penumpang thok, numpak bis trus dianter gutul kota tujuan. Inyong pingin penumpang bis DAMRI puas lan olih nilai tambah. Nah, ben pada puas, inyong kudu ngerti kekarepane konsumen DAMRI. Misale kepengin tempat duduk sing kaya apa. Trus jarak tempat duduke kurang longgar apa ora. Butuh tambahan toilet neng bis apa ora. Ruang khusus kebal-kebul nggo sing udud perlu disediakna apa ra usah. Perlu ditambah tv, karaoke, wifi, colokan charger hp apa ora. Selain kuwe, servis tambahan misale wedang teh/kopi, trus mangan neng restoran pas istirahat perlu dipikirna juga. Soale ana bis liya sing nyediakna servis tambahan kaya kuwe. Bis DAMRI jane ya wis nyediakna servis tambahan kaya kuwe, yakuwe snack karo banyu. Sayange servis kiye mung pas wulan puasa thok, yakuwe nggo takjil buka puasa. Apik jane kiye, perlu dipertimbangna kelanjutane neng selain wulan puasa sebagai wujud pelayanan prima.

Sedurunge bis mangkat, penumpang mestine nunggu neng ruang tunggu. Ning kenyataane akeh sing nunggu neng tempat selain sing wis disediakna, misale ngadeg neng sebelah e bis sing lagi parkir. Menurut inyong kiye mergane ruang tunggu sing ana kurang memadai. Ana juga sing dudu penumpang pada njagong neng ruang tunggu. Targete inyong ruang tunggu kudu nyaman nggo penumpang kaya neng stasiun sepur.

Selain ruang tunggu, fasilitas sing mesti ana nggo penumpang yakuwe toilet sing memadai, bersih lan nek bisa ya gratis. Mushola juga mesti sing memadai. Memang sih wis ana, tapi nek penumpang lagi rame dadi ora cukup, sek-sekan, kudu sholat ganti-gantian. Mestine sih diperluas maning.

Berikute sing ana kaitane karo perbaikan layanan penumpang yakuwe optimalisasi waktu tempuh. Menurut inyong waktu tempuh sing biasa dilakoni esih bisa dipangkas. Cara sing pertama yakuwe ngurangi jumlah cek poin. Sing wis berjalan saiki jumlah cek poin e ana loro, neng Cirebon karo Bumiayu. Nek cek poin Bumiayu dihapus, paling ora bisa ngirit setengah jam. Keloro, jalur sing dilewati bis terutama mulai mangkat sekang pul Kemayoran. Paling sering bis DAMRI sing mangkat sekang pul Kemayoran lewate PRJ Kemayoran, ngalor ngliwati Ancol terus mlebu tol Pelabuhan terus nyambung tol Cawang – Priuk. Sekang pul Kemayoran gutul Cempaka Mas diukur nganggo gugel map sekitar 20 km. Umpamane pak supir njukut jalur sing liwat Cempaka  Putih, gutul Cempak Mas mung sekitar  6 km. Secara jarak luwih cedek 14 km! Durung maning sedurunge mlebu tol Pelabuhan biasane pak supir ngisi solar dhisit. Tambah suwe kan?

4.     Ningkatna aspek keselamatan lan kedisiplinan

Menurut info sing tek waca neng media onlen, masinis sepur jarak jauh maksimal kerjane 4 jam, terus istirahat dhisit. Beda karo supir, sewengi mbethetet nggawa kendaraan dhewek ra nana gantine. Pak supir hebat ya? Beneran hebat apa merga tuntutan pekerjaan? Melek sewengi mbok rawan ngantuk. Ngantuk sedhilit baen mbok cilaka... kayane perlu ana kajian/penelitian proporsi nyupir sing aman ra ngantuk tapi juga ora merugikan keuangan perusahaan. Terus sing ra kalah penting, supir sing arep tugas kudu diperiksa dhisit kesehatane. Nek lagi kurang sehat ya ora olih dinas. Tinimbang mbahayakna penumpang karo pengguna dalan liyane.

Selain kuwe, kedisiplinan awak bis esih perlu ditingkatna. Nek wis wayahe mangkat ya ndang mangkat. Biasane sedurunge mangkat, ana pengecekan penumpang karo penyelesaian administrasi. Kiye biasane butuh wektu mandan suwe lan kudu dadi target perbaikanne inyong ke depane. Trus esih ana juga calo karo awak bis sing esih gelem nambah penumpang meskipun tempat duduk wis kebek. Hal kiye tentune kudu ditindak tegas. Soale kiye termasuk ora jujur, perbuatan korupsi lan tentune ngrugikna perusahaan. Saben Jumat aku numpak bis, ana baen penumpang gelap sing ra tuku tiket resmi trus manggon neng nduwur mesin. Sing kaya kiye kudu ditertibna. Ora jujur kok dipelihara. Percuma ana pengecekan penumpang ngasi ping loro, tapi penumpang gelap tetep esih ana... Masa kalah disiplin karo bis patas swasta?

Lagi enak-enake mikir program perusahaan, ujug-ujug inyong ngrasakna getaran sing berulang. Inyong dadi kaget, terus mbukak mata karo kriyap kriyep. Jebul bis DAMRI sing tek tumpaki nembe ngliwati pita penggaduh sedurunge gerbang tol Palikanci km 223. Pantesen gemredeg nganti nangekna inyong sing lagi ngimpi dadi direktur. Bubar kabeh program-program sing lagi tek susun...